بزاف كيسمعو على جدار برلين , ولكن قليل لي يعرف اشناهو هاد جدار برلين ؟ علاش كان و علاش سقط ؟

جدار برلين هو جدار كان فاصل مابين المانيا الشرقية وبرلين الغربية و تبنى سنة 1961 ومحصن عسكريا.
ولكن علاش تبنى ؟ وشكون بناه ؟
كلنا كنعرفو أن ألمانيا تهزمات فالحرب العالمية الثانية 1945, و بسبب هاد الإنهزام تم توقيع إتفاقية يالطا .
اشناهي هاد الإتفاقية ؟
هادي إتفاقية مبرمة من الإتحاد السوفياتي ' لينين ' و بريطانيا ' تشرشل ' و امريكا ' روزفلت ' و اشتاركات فرنسا حتى هي , و إتافقو هاد الدول بيناتهم على تقسيم المانيا الى اربع مناطق .
ولكن تم توحيد مناطق فرنسا وبريطانيا و امريكا 1949 و أعلنوا " المانيا الغربية '' و منطقة روسيا ولات هي '' المانيا الشرقية '' و قسموها بحدود محروسة .
ومن بعد وتحديدا فالحرب الباردة وسباق التسلح ما بين المعسكر الغربي " الدول الرأسمالية : تحديدا امريكا " و المعسكر الشرقي '' روسيا " كانت الضحية عاود تاني هي ألمانيا.
حيث بدات الهجرة الجماعية بأعداد مهولة للطبقة المتعلمة و المثقفة من المانيا الشرقية إلى المانيا الغربية و هادا سبب إحراج لروسيا فقررات انها تبني سور كبير فيه اسلاك شائكة و واصبح ممنوع المرور إلا بتراخيص و إجراءات أمنية. وهادا مامنعش الهجرة , بالعكس , امريكا بدات كاتدير تسهيلات فالمانيا الغربية و مغريات ' أسعار رخيصة و توفير الإحتياجات ' و وبقات الهجرة مستمرة , وحتى العسكريين مشاو المانيا الغربية :D
إنهار إقتصاد المانيا الشرقية , و الالمان حسو بلي هاد السور مقسمهم , بداو كيتظاهرو إحتجاجا على تقرير الإستثمار العالمي , حتى جا اليوم لي وصل الإحتجاج ذروته ' نص مليون شخص " كيطالبو بالتغيير السياسي وسقط الجدار 9 نوفمبر 1989 .
اش هي آثار هاد السقوط ؟
بداو الناس كيقدرو يسافرو من المانيا الشرقية للغربية بدون تأشيرة , و حتى 1 يوليو عاد تم إعتماد العملة و توحيد الدولة . 

تابع القراءة

علاش الماء H2O ماكايتحرقش

واش عمر سولتي راسك علاش الماء H2O ماكايتحرقش ؟ ، واخا مكون من الاكسجيين و الهيدروجين لي كايتعتابرو من اساسيات الاحتراق ؟
كيما كانعرفو الماء هو جزيئة مكونة من ذرة ديال الاوكسجين مرتبطة ب 2 هيدروجينات ..يعني دابا داك الاكسجين الواعر لي كايشعل العافيا ملي كان سيليباطير و كاينوض رواين هداه الله و خطب الهيدروجينات لي حتا هوما ب خبيزتهم و تزوج بيهم و اكيد ف اي زواج كايكون عقد لي فيه شروط يقدر يكونو امتيازات او حتا تنازلات و حتا خوتنا الذرات ملي كايديرو ديك الرابطة بيناتهم راه ماكايبقاوش كيفما كانو ف الاول..كايتغيرووو... وباش نقرب ليكم الصورة اكثر مثلا البنت قبل الزواج او قبل العلاقة كاتكون بنت من مورها كاتولي امرأة يعني فقدات خاصية العذرية بعد الزواج يعني شي حاجة فيزيولوجية تبدلات فيها بعد ديك الرابطة مع الطرف الاخر ، و نفس الشيء بالنسبة ل الذرات كايوليو بحلة جدييدة من مور الرابطة . و كيما كانعرفو كل ذرة فيها des orbitales لي كايدورو فيهم الالكترونات ، اعتابرهم بحال شي حلقااات فوسط الذرة كايشدو فيهم الالكترونات ستوون و ملي كايوقع ارتباط بين 2 عناصر كايتغيرو الاوربيتالات حتا هوماا ماكايبقااوش كيفماا كانو فالاول و فالتالي الالكترونات و السحابة الالكترونية كايتغيرو .
وا تصور معايا كنتي واقف ف شي بلاصة و جاك شي زلزال راه اوطوماطيكمون غادي تبدل البلاصة فاش كنتي واقف ياما تزيد القدام ياما لور و هكذا ، و ف الاصل الاكترونات خدمتهم هي تحنقيز ف الاوربيتال كيفما قلت شادين ستون و ملي كايتغير الاوربيتال كايتغيرو معاه مثلا ايلا كنت ف بيت فيه 6 ميترو و بديتي كاتجري من للقنت للقنت فاكيد غاضرب 6 مترو ولكن ايلا نقصناها و درنا ليك واحد الحيط فالنص يعني قسمنا البيت للنص ف غاتولي تجري غي ف 3 متروو..و هادشي لي كايطرا ل الاكترون ملي الذرة كاتزوج كاتخرب عشتوو و كيما كانعرفو الاكترونات هوما لي مسؤولين عن خاصيات الذرات و ملي كاتبدل فيهم اي حااااجة راه الذرة كااتبدل معاهاااا سوءااا جزيئا او جذريا و هاد الحالة الثانية راه صعيبة . ف مثلا ايلا معدتك ملتهبة فأكيد غادي تمرض و اوطوماطيكمو غادي تدير الريجيم و الجسم ديالك غادي يضعاف .
و فالتالي اي تغير ف الكترون يساوي تغير ف خاصيات الذرة يساوي الهيدروجين و الاكسجين ماكاتبقاش عندهم القدرة باش يشعلو العافية او بالاحرى كايفقدوهاا بسب الرابطة لي جمعاتهم و فالتالي ماكاين لا عافية لا ستة حمص ، و داكشي كايبقاا غي ذكرى ليهم يامات كانو سيليباطير...الحب تضحيات يا سادة . نتمنا تكون وصلاتكم الفكرة .

#خربشات_مريم_بنعلي

تابع القراءة

ستيف جوبز Steve jobs

كلافيي Simo Feynbert 

اليوما قررت نخرج من قبري و نعاود ليكوم على صغري و كيفاش دوزت حياتي و عمري !
خرجت للحياة بخطأ طبي من الأب ديالي لي كان مصاحب مع الأم البيولوجية ديالي ...
المهم وقع داكشي، و كنتيجة لداكشي خرجت أنا للحياة، مدرسة المُعاناة
ماما بحُكم أنها كانت طالبة ما قداتش تربيني و تعتاني بيا و رماتني لعائلة تتبناني و تربيني ..
المهم كبرت قريت حتى وصلت للافاك fuck (الجامعة) و بسبب أن واليديا لي رباوني ما قدوش و ينفقو عليا و بسبب أني شت الجامعة ديال التب ما غا تفيدني بوالو، قررت نخرج منها و نأسس لحياتي خارج أسوار السجن الجامعي.
غا تجيك غريبة أني ما تخرجتش من لافاك fuck .. بالرغم من النجاحات ديالي لي كا تشوفها دابا بأم عينيك.
و حتى أنا جاتني غريبة فالأول، و ما نخبيش عليك أن القرار كان صعيب بزاف.
و لكن من بعد كتاشفت أن هاد القرار كان أحسن و أقود قرار تاخدتو فحياتي ...
لأني ملي خرجت من لافاك ، ما بقيتش كا نقرا دوك الموديلات لي ما كا نحملهومش
و نجحت أني نتفرغ للمواد لي كا نعشقها و كا يرتاح ليها قلبي ...
و هادشي ما كانش ساهل و رومانسي ...
ما تنساش أ جمي أنه ما كانتش عندي شومبر ننعس فيها، و بسبب هادشي كنت كا نفرش على الأرض و ننعس عند العشران فالشومبرات ديالهوم ...
كنت كا نبيع الخاوي ديال كوكا باش نشري ما ناكل ...
و كنت كل نهار كا نمشي مسافة طويلة على رجلي ..
شحال من مرة بسباب ضجيج المُحيط ديال التب لي داير بيا، كا نتخلى على الهوايات ديالي و الفضول ديالي و كا نتنعتر .. لأني ما كا نبقاش تابع قلبي ...
و من بعد تبين ليا أن الفضول و الحدس و الشغف و اتباع القلب و الصوت الداخلي هوما أسرار النجاح لأي واحد كا يحلم بتغيير العالم.
لي بغيت نوصل ليك هو : تبع قلبك و داكشي لي كا ترتاح ليه، لايك ديك الساطة (أو الساط بالنسبة للبنت) لي كا تحبها و تحس بقلبك كا يبغيها ...
رضى على راسك
و الطريقة الوحيدة باش تكون راضي على راسك هي دير داكشي لي كا تبغي .. داكشي لي كا تستمتع بيه و ترتاح ليه و تلقا داتك و وجدانك و كيانك فيه ...
و إذا كنتي مازال ما كتاشفتيش العمل لي نتا حي من أجلو، صبر و قلب عليه، و كون على يقين أنك غا تلقاه. و بحال العلاقات العاطفية مع الوقت العلاقة غادة و كا تطور من صداقة لحب لعشق لهوس و جُنون ...
ملي كانت فعمري سبعطاش لعام، قريت واحد القولة و بسبابها تغيرات حياتي :
" إذا كنتي كا تعيش كل نهار على أساس أنه آخر نهار فحياتك، فضروري و مؤكد أنه غادي يجي داك النهار لي تحس براسك كنتي على حق و غا تفارق الحياة "
من داك النهار و أنا كل نهار كا نفيق فالصباح أول حاجة كا نديرها هي كا نشوف فالمراية، و نسول راسي :
"إذا كان هادا آخر يوم فحياتي، آشنو خاصني ندير ؟ "
" و واش فعلا أنا كا نستمتع بهادشي لي كا ندير ؟ "
إذا كان الجواب هو : "لا" كا نعرف و نفيق أني خاصني نعاود النظر فراسي، و كا نعرف أنهُ كاينا شي حاجة لي ماشي هي هاديك، و لي خاصني نصلحها.
أحسن حاجة بالنسبة ليا باش تبقا محفز و مستامر فالإبداع و العطاء ديالك هي تفكر راسك بالموت. بداك النهار لي غا تفارق فيه الخوت.
بهاد العقلية ديال راك غادي تموت، تشجعت أني نتاخد أقود القرارات فحياتي. و لي كان أحسن واحد فيها هو نهار قررت نخرج من لافاك fuck . لأني فعلا ما كنتش مرتاح فيها و ليها، و كانت كا تجيني ما عندها تا معنى تفيق مع الصباح و تهز شكارتك باش تحضر لشي قواد يجي يلقي عليك الخطبة ديالو و يخلعك بليكزامان.
المهم هاد البلان ديال "راك غادي تموت" ساعدني بشكل كبير باش نتحدى الخوف و الأحراج و الفشل، و نركز على داكشي لي مهم بزاف.
ديما فكر كرك أنك غادي تموت باش ما تبقاش خايف من أنك غادي تخسر شي حاجة.
فكر راسك بالموت و بسباب هاد التفكير غادي تقتل شبح المُستقبل و تتحرر من سجن الماضي.
المهم مشيت بهاد العقلية و حققت إنجازات مقودة فحياتي لي من بينها هاداك الأيفون لي نتا مكونيكطي بيه، و ديك الفارة لي كا تحركها فالبيسي pc ديالك... و شركة ديال الرسوم المتحركة وبزاف ديال الحوياج، ماشي موهيم هادشي الموهيم هو تعرف كيفاش وصلت و شنو هي الطريق لي سلكت و العقلية باش مشيت و المعاناة لي منها مريت.
المهم بديت ديما كا نفكر راسي بالموت، و جعلت من هاد التفكير حافز ليا باش ندير لي فجهدي باش نوضع بصمتي فالعالم قبل ما نودعو... حتى جات اللحضة لي غا يقول ليا فيها الطبيب أنك مريض بالسرطان و أنه بقات ليك ما بين 3 حتى ل 6 شهور و تودع هاد العالام.
الأطباء لقاو عندي ورم فالبانكرياس، و كانت أول مرة غا نتعرف فيها على آش كا تعني بانكرياس.
الموهيم نصحني الطبيب قال ليا : سير عند عائلتك و نظم أمورك و حل مشاكلك.
و هادشي كا يعني بلغة الأطباء، وجد كرك باش تموت. و صلح حالك مع الخوت.
هادشي كا يعني أنك غا تمشي لعند أطفالك باش تقول ليهوم ديك الهضرة لي كنتي مبلاني تقولها ليهوم من بعد عشر سنوات.
حتى شي ولد القحبة فهاد الحياة ما باغي يموت، حتى هادوك لي كا يآمنو بالجنة و التيتيز و الخلود الأبدي، بكرهوم مازال كا يخلعهوم كابوس الموت.
الموت هو الحقيقة تاع بصح لي ما عمر شي واحد نجا منها، و لا رجع منها باش يعاود لينا على ما وراء الموت.
الموت هو أحسن عامل من عوامل الحياة لي كا يحيد القديم باش يفتح الطريق أمام الجديد.
الجديد هو نتا أتبي لي جالس كا تقرا فلارتيك ديالي.
وقتك أتبي محدود، و إلى غتانمو قبل ما ياكلك الدود، و عيش حياتك بلا حُدود.
ما ضيعش وقتك فأنك تحاول تعيش الدور ديال الضحية، أو دور شي قواد آخر لي كا تحاول تكون بحالو، كون نتا أ تبي be yourself . كون نتا قبل ما يجلسوك على اللفتة.
ما تخليش ضجيج العالم الخارجي يأتر على صوتك الداخلي.
و ما تنساش أن رأي الناس فيك ماشي بالضرورة يبرهن عليك.
كُن بطل أ تبي، و تبع قلبك و حدسك، هاد الجوج هوما لي عارفين الدور و الوظيفة ديالك فالحياة.
و أي حاجة أخرى كا تبقى ثانوية.
و آخر نصيحة نوصيك بيها و لي جعلتها شعار من أقود شعارات حياتي :
بقا جيعان، بقا حمق. stay hungry, stay foolish
بقا جيعان، باش ديما تكون الشهية مفتوحة للماكلة، ماشي ديال الكرش أ تبي.
الماكلة ديال العقل، بطريقة أُخرى بقا ديما عطشان للمعرفة و التعلم.
و بقا حمق، بمعنى أن الناس المقودين فالحياة ، تصرفاتهوم كا تبان غريبة و حمقة و مجنونة بالنسبة للآخر، و الجحيم هو الآخر، و بالتالي ما تسمحش ليه يشويك فجاهنام ديال الكريتيك و الإستهزاء ديالو. بقا ديما حمق بالنسبة ليه ...
هاد المجانين لي بكترة الجُنون وصلات بيهوم لدرجة أنهم كا يفكرو يغيرو العالم، هوما فعلا لي نجحو فتغيير العالم. و على راسهوم أنا مول هاد الرسالة ديال الوداع.
وي غيرت العالم و أسست أقود شركة من شركات التكنولوجيا لي هي ديك التفاحة المعضوضة.
خليك وردة نابتة وسط الشوك.
خليك شمعة شاعلة فوسط الظلام.
خليك نسر عايش واسط الدجاج.
خليك مُربع عايش وسط الدوائر.

تابع القراءة

مؤتمر الاطراف cop22

العالم كامل حاط عينيه على المغرب هاد اليامات حيث غادي نظموا COP 22 . اش ناهو هاذ الCOP ؟ و علاش كيدار ؟ 

COP هو اختصار لConference Of Parties بالعربية مؤتمر الاطراف كتنظموا الامم المتحدة كل عام و لمدة 21 عام دابا في كل دولة من دول لي سينات عليه من مورى فاش جات فكرة ديالو فاش سالا واحد مؤتمر ديال مناخ

1995 كان اول COP 1 في المانيا تجمعوا باش ياخدوا قرار بلي خاص انبعاثات الغازات الدفيئة تنقص حيث هي سبب في الاحتباس الحراري . 1996 تنضم COP 2 في سويسرا باش يدرسوا اخطار الاحتباش الحراري على البشرية .

و لكن COP 3 لي تنظم في كويوطو ، اليابان في 1997 خرجوا فيه بقرار حيث بعد من 11 يوم ديال تفاوض ، 37 دولة سينات على برتوكول كتلتازم فيه انها غادي تنقص من انبعاتاث الغازات الدفيئة بنسبة 5،2 بحلول عام 2012 . تحت اسم " برتوكول كيوطو" . من بعد جا COP4 في الارجنتين عام 1998 و الCOP5 في المانيا عام 1999 مخدموش شي حاجة كبيرة غير وجدوا للبروتوكول و عرفوا الخدمة لي غادي تكون في العاماين الجاية.
ال COP 5 لي كان في هولاندا في 2000 جمع 182 دولة الهدف كان تنفيذ برتوكول كويوطو . و في لخر ديال هاد تجمع متافقوش . قالوا صافي تالعام جاي و نفكوها.
الCOP 6 في المانيا 2001 فين خاصهم يفكوها فذاك العام جورج بوش ولا رئيس الولايات المتحدة ناض قال ليهم انا مبقيتش لاعب و ممطبق لا برتوكول لا والو . داكشي علاش خرجوا بقرار يأسسو سوق الكاربون يعني طريقة باش الكاربون يغلا 😏. داكشي علاش في 2001 كان الCOP 7 في المغرب باش يتحدد صرف الكاربون و باش يلتازمو فيه دول المتقدمة باش تعاون الدول نامية باش تكيف ( يعني الاندماج ) .
من 2002 تال 2004 تنظم COP 8,9, 10 في الهند و ايطاليا و الارجنتين هاد المؤتمؤات بثلاثة باش يالله يقادو داك الاندماج ديال دول لي تافقو عليه و بداو يوعيو ناس على اخطار الاحتباس الحراري.
الCOP 10 كان فرصة ليهم باش يعاودو تفكير في برتوكول كيوطو و خافوا لميوصلوش للاهداف لي رسموها .
عام 2005 تنظم الCOP 11 في كندا هاذ المرة مع 188 دولة و تافقوا باش يطولو في عمر البرتوكول يعني 2012 مبقاش بان ليهم فيها .
في 2006 الCOP 12في كينيا كانوا باقين يهضروا على البروتوكول وو اندماج الدول في وصل .
20017 تنضم الCOP 13 في اندنوسيا كان غير للمفاوضات و صافي. 2008 الCOP 14في بولندا تزادت 27 دولة من الاتحاد الاوروبي باش ينقصوا من انبعاثات الغازات الدفيئة .
داكشي علاش في 2009 في الCOP15 لي تنضم دنمارك فكروا يلقاو بديل لبروتوكول كيوطو . و خرجوا بإنشاء بحث جماعي عن الطاقة المتجددة او اي حاجة قادرة تنقص من الانبعاثات الغازية . و كيف العادة امريكا و صين مبغاوش حيث خافو على خدمتهم.
2010 تنظم COP16 في المكسيك فيه أسسو صندوق المناخ لوصل تمويل ديالو ل100 مليار دولار . و تافقوا بلي خاص درجة حرارة الارض تنقص ب 2 درجات .
الCOP17 لي تنض في جنوب افريقيا عام 2011 طرحوا البرتوكول الجديد لي غادي يعتامدو عليه في 2005 و يطبقوه في 2020 . و سماوه بروتوكول كيوطو 2.0 . حيث البرتوكول اللول ضعاف حيث روسيا و اليابان و كندا انساحبوا و زيد امريكا و صين لي اصلا مكانوش لاعبين . حيث الدول لي بقات يالله كتمثل 15% من الانبعاثات العازات الدفيئة .
في 2012 الCOP18 في قطر ناقشوا باش يوسعوا صندوف المناخ . COP19 في بولاندا 2013 و الCOP20 في البيرو 2014 ناقشوا فيه البرتوكول الجديد لي هضروا عليه في 2015 في فرنسا في الCOP21. يعني الCOP22 لي غادي يكون في مراكش سيمانة الجاية و على حساب الشعار لي كاتبين فراه حاجة من جوج يا اما صافي غادي يطبقوا و يخرجوا قوانين و لجن المراقبة او يحسن و يزيدوا في البرتوكول الجديد حيث في ال COP21 حظرت 192 دولة من بينها امريكا وصين روسيا .
المهم كان هذا اختصار على تاريخ الCOP و اش تناقش فيه .
سؤال : واش هاد ناس كيتجمعوا باش يعتقوا الارض نيت ولا غادي يبقاو يتجمعوا حتى تفرقع علينا شي نهار ؟؟

كلافي: Kaoutar hassioui

تابع القراءة

أنواع الجسم

زاف لي كيدير الرياضة وماعرفش اش كايدير مع كااامل احتراماتي ليهم ، ولكن تحياتي ليهم لأنها خطوة اجابية
و هادشي غلط لأنهم ماكايقراو ماكايبحتو غير يتفرجو فڤيديو فاليوتوب ولا يشوف شي حد دار شي حركة و يبدا يقلد ، راه كل جسم و النوع ديالو
يعني الى عرفت نوع الجسم ديالك غادي تعرف نوعية التمارين و النظام الغذائي للي يجيو معاك
كنت سمين و بغيت تنقص و تحرق الدهنيات او كنت رقيق و بغيت تكتسب كتلة عضلية
مهم بلا مانكثر فالهدرة و لبلابلا ، آراك للصح
كاين تلاتة ديال انواع الجسم و هي الرئيسية ، نعام آسي

#الأندومورف_Endomorph *ضخم* :
هاد النوع غليظ و عامر من عند الله واخا گاع ماياكلش بزاف يبقى غليظ و فيساع يكتسب الوزن و %60 من هاد النوع قصار القامة
#الميزومورف_Mesomorph *عضلي* :
وهاد النوع كاين بزاف ، الجسم متوسط و طول القامة متوسطة الى كلا مزيان كايصحاح و العكس الى ماكلاش كايضعاف ...
#الاكتومورف_Ectomorph *نحيف* :
هاد النوع رقيق و عندو مشكل فزيادة الوزن كايفقد الوزن بسهووولة و %60 كايكونو طوال القامة

#الاندومورف *ضخم*:
الصفات :
يدين و رجلين قصار و زيد عليها أن حجم الجسم كامل يتركز على الجسم القصير عوض من الطبيعي.
وهاد الشي ماكايخليش الأشخاص أصحاب هذا النوع باش يشاركو فالمنافسات الرياضية اللي تحتاج للسرعة والرشاقة في الحركة.
الوزن الكبير لاصحاب هذا النوع يخلي من الصعب عليهم أداء الأنشطة اللي كاتطلب قدرة هوائية عالية كالجري.
عندهم قدرة كبيرة على اكتساب الوزن
و يقدرو يخسرو مستواهم الرياضي بسهولة منين ينقاطعو عن التدريبات.

#الميزومورف *عضلي* :
هاد النوع يتواجد فالرياضات اللي تحتاج للقوة والرشاقة والسرعة.
التكوين ديالهم المتوازن والمتوسط ( بالنسبة للطول )
زيد عليها القدرة على اكتساب العضلات والقوة بسهولة
أصحاب هذا النوع يستجيبو مزيان لأنواع التدريبات اللي تحتاج للكفاءة فعمل الجهاز التنفسي وتدريبات المقاومة "بحال طراكسيون و لابارفيكس..." بسبب القدرة الجيدة على التكيف والاستجابة.
أصحاب هذا النوع يقدروا يثبتوا كمية الدهون و بستطاعتهم إنقاص أو زيادة الوزن بسهولة .

#الاكتومورف *نحيف* :
الصفات :
الأغلبة من هاد النوع كايكونو رقاق و طوال لأن الجسم ديالهم كايحرق السعرات الحرارية بشكل عجيب
والحجم الصغير للعضلات والضعيف يخليهم أكثر عرضة للإصابات

قلة العضلات المكونة للجسم ديالهم ماتخليش عندهم القدرة باش يشاركو فالرياضات اللي كاتطلب قدرة وأحجام كبيرة للحركة "كالريجبي.."
#ملاحظة :
بسبب التزاوج و اختلاط الجينات مستحيل تلقى شي نوع صافي %100
مثلا :
تلقى انسان
%63 ميزومورف
%22 اكتومورف
%15اندومورف

انشاء الله غادي نتطرق لكل نوع بوحدو بالتمارين للي تجي معاه و نوع النظام الغذائي

#يتبع
#هشام

كلافي: Hicham azioui

تابع القراءة

واش بلاد الواق واق كاينة بصح ولا غي خيال؟

فعلا تذكرات فكتب التراث العربية القديمة . و حددوا فين كاينة فبحر الهند أو بحر الصين. ومن الكتب والروايات لي ذكرات هاد الجزر رواية ألف ليلة وليلة فقصص السندباد البحرى . وسميت (الواق واق ) حيت فيها أشجار هازة واحد النوع غريب من الثمار تتشبه للراس ديال مرأة شعرها طويل ، وملي تتطيب هاد الثمار وتطيح على الأرض وتيدوز عليها البرد ، تيتسمع صوت شبيه ب واق واق.😛
محمد بن زكريا الزهوي (العالم الجغرافى ) وصفها بأنها بلاد غنية جدا وفيها بزاف الذهب إلى درجة أن أهل هذه الجزر تيلبسو حوايج مصايبة من الذهب وأنهم تيلبسو قردتهم طوقا من الذهب وتيربطو كلابهم بسلسة من ذهب.

وكاين فالعرب لي دواو تاهوما على جزر الواق واق، العربي موسى بن المبارك السيرافي، لي تيقول انه دخل هاد الجزر التي تتحكمها امرأة، وأنه شاف هاد الملكة وهي جالسة على عرشها وحاطة تاج على رساها وماتبقى عريان، وعندها 4 آلاف من الوصيفات اللي كانو بكريات وعاريات تاهوما. 
يعتقد أن العرب استخدموا مصطلح الواق واق لتسمية جوج بلدان مختالفة من بين مجموعة من البلاد التي كان الرحالة والبحارة تايمشيو لها .وتقد تكون فالشرق الأقصى وتحديدا فمنطقة كاينة على الشاطئ فالشرق ديال آسيا وفالشمال ديال الصين، وكاين رأي أخر أن العرب كانوا يتيمشيو لجزيرة مدغشقر ومن كثرة وجود الذهب فيها، و العرب كانو تيقولو الواق واق على نوع من الألوان ديال التبر (الذهب الخام).
الخلاصة هي مكينش شي حاجة مؤكدة، مجرد روايات وتتبقى جزيرة الوقواق كتحتافظ بالغموض ديالها.

كلافي : Chafik bouguezour

تابع القراءة

شنو هو VoIP

كلافيي Mohammed Benjelloun

-- يلا خدينا كمتال شانطي كبير هيكون مقصم للبزاف ديال الممرات ( ممر السيارات، الدرجات،الشاحنات، الكيران..) إدا اعتبرنا الانترنت هوا هاد الشانطي الكبير فتا هوا مقصم لبزاف ديال الممرات كنسميوهم بروتوكول وكل ممر كيدوز واحد النوع ديال المعلومات متلا نصوص كيدوزو في برتكول سميتو http و الملفات فواحد سميتو ftp و بنسبة للمعلومات الصوتية و المرئية سميتو VoIP يعني جميع الإتصالات اللحضية لي كدوز عبر الأنترنت كتمر فهاد الممر و هاد البرتكول كيستخدموه تقريبا كل البرامج و التطبيقات بحال skype , massenger ، whatupp ، vibre و كذلك الهواتف التابتة لي كتستخدم خط الأنترنت فالتصال يعني محد عندك الأنترنت هدي تبقا دوي فيه نهار كلو و مهتخلص على شحال دويتي من ساعة و هاد العيبة كيستخدموها ليصونطر دابيل باش يدوزو مكالمات دولية و مكيخلصو عليها والو معدا 200dh ديال الانترنت فشهر.

-فالبداية ديال 2016 تفاجؤوا المغاربة بلي هاد الخدمة تقطعات و علنات وكالة الوطنية للسمعي البصري ANRT ( عندي معاها قصة ) بلي قطعاتها حيت كيستخدموها الإرهابيين فالتصال و كتهدد سلامة الوطن و لكن واش بصح ؟؟ هنا هاد الوكالة كتستحمر الشعب حيت هاد البرتكول المعلومات لي كدوز فيه مكتكونش مشفرة يعني ممكن يتصنتو على المحادتات لي كتكون دايزا فيه و المنظمات الإرهابية مشي مكلخة تستخدموا اصلا حيت كين برمجيات اكتر تعقيد من اجل الاتصال معلينا وإذا بغيتي تستافد منو خلص الفلوووووووس إدن شنو هوا السبب لاش قطعوه ؟

-- السبب هوا انه فاش ضهرات 4G فالمغرب ولات سرعة حسن من 3G و تا wifi و اتصال بهاد البرتكول حسن تا من المكالمات العادية زيد عليها جودة الصوت يعني شركات الاتصال هما لي تضررو وعوض الناس مكتعبأ 20 درهم باش تدوي 15 دقيقة للخارج كتعبأ بيها الأنترنت و تدوي سمانة للخارج معا العائلة و داخل معا girlfriend نتاعك و بتالي حلزونة المغرب و ميديتال و إنوي ضغطو ANRT باش قطعاتو ورجعو للتعبئة لي كيوهمو ناس بلي مضوبلة 10 مرات و زيد عليها الصونطرات دابيل لي مكيخلصو والو لهاد الشركات هدي يوليو يخلصو فلوس صحيحة الشيء لي هيخلي المستتمرين يهربو من المغرب و الآلاف دفرص الشغل هضيع.
سؤال واش من حق ANRTتقطع هاد الخدمة ؟؟

-- الجواب هوا ان الأنترنت فالمواتيق الدولية حق للجميع و معندش الدولة الحق تقطعو عليك ولا تقطع عليك شي جزء منو بحالو بحال الصحة و التعليم إضافة الدستور المغربي كينص على عدم الحتكار و حيت ANRT مقطعاتوش فمرة ولكن احتكرات الخدمة و زيد عليها مكينش شي قانون داز فالبرلمان و تم التصويت عليه باش يمنعو هاد الخدمة.
من هدشي كامل حيت cop22 قرب و باش المغرب يخرج راصو من هاد الورطة حيت الضياف ديال الكان هدي يستخدموه قاليك تم عزل المدير العام ANRT يعني على و جه الضياف هدي يرجعونا ندويو واحد السمانة.

تابع القراءة

علاش الأرض ماشي مُسطحة

بكلافيي Simo Feynbert 

ما تحتاجش أ جمي للأقمار الإصطناعية باش يصوروها ليك من الفوق و تشوفها مكورة، يكفيك فقط تمارس عملية التدبر و التأمل فالظواهر الطبيعية و غا تستنتجها لراسك.
340 سنة قبل الميلاد، فالكتاب ديالو On the Heavens "عن السماوات" !
تمكن الفيلسوف الإغريقي أرسطو Aristotle من طرح جوج تاح الحُجج على أن الأرض كروية الشكل ماشي مُسطحة.
الحُجة 1 : الخُسوف Eclipses ، ملي كا تجي الأرض بين الشمس و القمر فخط مُستقيمي، و كا يبان الظل ديال الأرض على القمر. كا نلاحضو أن هاذ الظل عندو شكل مُستدير.
إستنتاج : الأرض عندها شكل كُروي.
الحُجة 2 : النجم الشمالي فالمناطق الجنوبية كا يبان منخافض على المناطق الشمالية.
إستنتاج : الأرض ماشي مُسطحة، و لوكان كانت مسطحة أ بوسنطيحة، لوكان بان قد قد.
و كاينا حُجة ثالثة لاحظوها عُلماء الإغريق بمئات السنين قبل الميلاد لي هي :
الحُجة 3 : ملي كا تكون السفينة غادية فالبحر، كا نلاحضو الشراع ديالها هو الأول قبل ما نلاحضوها.
إستنتاج : الأرض ماشي مُوسطحة أ خاي المسنطح، سينون، كنتي غا تشوف السفينة كاملة.
المصدر :
-A Brief History of Time: From the Big Bang to Black Holes is a 1988
By : British physicist Stephen Hawking

تابع القراءة

Walt Disney مخترع الرسوم المتحركة ، مخرج ، منتج ، كاتب سيناريو، و رجل أعمال

تزاد والتر ديزني عام 1901 فشيكاغو ، من أب مزارع إيرلندي الأصل ، أما الوالدة ديالو فكانت معلمة فشي مدرسة. عام 1906 هربات الأسرة من شيكاغو للي انعدم فيها الأمان فذيك الفترة ، و انتقلوا لشي مزرعة بولاية ميسوري ، فهاذ المزرعة تعرف والت على موهبتو فالحياة للي هي الرسم ، و ماكانش كيعاون فتمارة المزرعة بحكم أنو باقي صغير عليها ؛ كان كيدوز أغلب وقتو فاللعب مع ختو الصغيرة ، ولا كيظل يرسم فالحيوانات و القطارات -حيت كانوا ساكنين قراب للسكة و كان كيبهرو منظر القطار-. الأب ديالو مرض من بعدما دوزوا ربع سنين فالمزرعة ، و اضطر يبيعها و ينتقل هو و وليداتو لمدينة كنساس عام 1910.
بدا خونا تمارة بكري باش يعاون بّاه و خوه ، و كانت توزيع الجرائد أول خديمة فحياتو و هي أيضا السبب الأكبر للي خلّاه مايجتهدش فقرايتو ؛ بحكم الجهد و الوقت للي كتطلبهم هاذ الخدمة ، كان ديما ماكيركزش ولّا كتوصل بيه يغفى وسط القسم.
عام 1917 تخرج والت من الثانوية ، و بدا كيحضر لصفوف دالرسم باش يزيد ينمّي موهبتو. فبداية الحرب العالمية الأولى زوّر والت تاريخ ميلادو -زاد فيه عام باش قدر يلتحق بوظيفة ثابتة- ، و التحق بالصليب الأحمر ؛ خدم معاهم كسائق دالأسعاف فشي بعثة بفرنسا . من هاذ الوظيفة كان كيشيط مصيريف , و كيستغل ساحات المعارك كيّاخد منهم تذاكر حربية و كيعاود فيهم البيع . و منّي سالات الحرب رجع فحالو لبلادو.
أول خطوة دارها فطريق نجاحو ، هي اكتشافو لنوعية أحلامو و تحديدو لأهدافو فالحياة ، بغا يولّي رسام كاريكاتيري ، و بدا كيقلب على خدامي فهاذ الضومين حتى طاح فبوسط كرسام كرتون فشي شركة ، وولّا من أحسن الرسامين فيها.
من بعدمّا اكتسب والت الخبرة فذيك الشركة ، قرر أنو يدير قفزة نوعية فحياتو ؛ أسس شركة إنتاج سمّاها "Laugh O Gram film" , باع جزء منها بـ15000 دولار باش روّج الحركة ، و بذاك راس المال نتج أول جوج أفلام دالكرتون من قصص الخيال. 
و واخّا نجحات ليه الفكرة و لقات إقبال جماهيري ، إلا أنها مارجعات ليه حتى ربح. و غير سالا إنتاج فيلم "أليس في بلاد العجائب" علن على إفلاسو ، و خرج منها بنسخة من الفيلم.
من بعدمّا فشل ، ما استسلمش و خدم فوتوغرافي لإحدى الصحف ، بيها قدر يجمع شوية داللعاقة باش يرجع يكمل حلمو.
و ذيكشي للي طرا ؛ تحوّل هو و خوه الكبير لهوليوود ، و أسسو بجوج Disney Brothers Studio فكاراج ديال عمّهم ،كافحوا فالأول بزايد و دازو بعقابي و حدورات حتى قدروا يوقّفوا الشركة على رجليها ، و تمكنوا يشهروها عالميا ؛ خصوصا مللي نتجوا فيلم " بياض الثلج و الأقزام السبعة" للي كانت أرباحو عالية.
هاذي كانت بداية نجاحو ، و آخر محطات كفاحو ، استمرت الشركة فالعطاء و الربح من نهار بدات إلى يومنا هذا ، و واخّا واجه فيها إخفاقات قدر يسيطر عليهم و خلّاها تزيد من الحسن للأحسن. طور الشركة بزاف و خرّج منها مشاريع مختلفة .
هكّا كانت قصة اجتهادو و مقاومتو للعقبات و للفقر ، و هكّا قدر يوصل و يحقق حلمو للي شاف فيه راسو و لقى فيه حبّو و شغفو . أما قصة ما بعد النجاح فيها شلّا ما يتقال.
نعطيكم شوية من ذيكشي للي وصلات ليه شركة ديزني للي كتعتبر لدابا أكبر شركة ترفيه فالعالم :
- Disney Land 
- 39 فندق 
- 18 استوديو سينمائي
- 11 قناة تلفزيونية بالاشتراك
- قناة ABC الأرضية ...

إضافة : ما نساش نذكر أن والت ديزني هو أكثر واحد ربح جوائز الأوسكار (22 مرة) + (2 جوائز أوسكار تكريمية فخرية).

تابع القراءة

حرب طروادة war of Troy

كلافي : Shaymae El Jawahiry

حرب طروادة من اشهر حروب لي دازت فمثولوجية حرب طروادة أو تسمى حصار طروادة جات سمية من مدينة Troy المتواجدة في اسيا الصغرى مدينة بحرية بناها بوسيدون إله البحر وابولو إله الشعر والفنون دامت هاد الحرب 10سنين... 
يحكى انه تنبأ بعض عرافات انو غادي يتزاد واحد الابن سميتو باريس (الابن ديال الملك طروادة بريام) غادي يكون هو السبب في دمار طروادة مني غادي يتزاد غادي يأمر الملك احد خادمات ديالو باش تقتلو ولكن هي غادي ديه لواحد الجبل غادي تحطو تما غادي يكونوا الآلهة الاثني عشر بينهم عداوة وغادي تضوبل هاد العداوة بسباب ثروات والخيرات لي كاينة في طروادة من هنا غادي تجي قصة ديال التفاحة لي غادي تنوض الحرب مابين افروديت (الهة الجمال و الحب) وهيرا (آلهة الزواج) واثينا(آلهة الحكمة والمجد) شافت كل وحدة راسها هي الأجمل واتفقوا أنه أول غريب غادي يشوفوه يعطيوه يختار الأجمل من بينهم صدفة القدر جابت باريس لي تربا فالجبل ولا راعي غنم اغرته هيرا انه الا ختارها غادي تعطيه السلطة واثينا الحكمة والمجد وواعداتو افروديت أنها غادي تعطيه أجمل نساء الأرض ففضلها عليهم وعطاها التفاحة.... وفريمون وفات افروديت بكلمتها ورجعاتو لطروادة مرفوع الرأس ورداتو أمير من بعد ما كان راعي غنم وباش تكمل وعدها داتو لاسبرطة استغل غيبة ديال راجل هلين ولي هي أجمل نساء الأرض بغاوها جميع الملوك وتسابقوا باش يفوزوا بقلبها ولكن ختارت ميلانس زوجا إلا أنه من بعد ما شافت باريس عشقاتو بسبب سحر لي عطاتو فينوس كان باريس في ضيافة زوج هيلين شافتوو وعجبها وقرروا يهربوا لطروادة متسببة فندلاع أكبر حرب عرفاتهاا لامطولوجي دامت 10سنوات
ولكن شنو غادي يوقع من بعد واش غادي تبقى معاه الا الابد؟ و اش كاينة أسباب أخرى خفية؟ وكيف تم الاستعداد لهاد الحرب هادشي لي غادي نعرفوا فالحلقة الجاية 

تابع القراءة

مارسل خليفة MARCEL KHALIFE

بكلافيي Marouane Bouaouda

هاد ليامات تچهمنا بالهدرا على السياسة والحراك الشعبي لي كانتمناه إتواصل . معليناش ليوم جيت نهدر على واحد السيد لي أقل مايمكن القول عنه أنه من عظماء الموسيقى عبر التاريخ ، هاد السيد هو الأستاذ والموسيقار الكبير مارسل خليفة .
مارسل خليفة تزاد فواحد البلدة فلبنان سميتها عمشت نهار 10 يونيو 1950 ، هاد السيد التخصص ديالو آلة العود وما ادراك مالعود ، آلة العود لي وقيلة كيتقنها كتر من إستنشاق الأوكسجين ( لا هادي زدة فيها شوية ههه ) ، فاش كنت كندير البحث ديالي على هاد السيد وصلت للمهنة و لقيت بزاف ديال المهن و لي هي ملحن و مغني و مؤلف موسيقي يعني سيد بعبارة أخرى خاتر موسيقيا ( گاليك سعد لمجرد مع إحترامي ليه كشخص الموسيقى بعيدا عليه !! ) . الأستاذ مارسل خليفة معروف بالتعاطف ديالو مع القضية الفلسطينية وهادا كيبان من خلال الأغاني ديالو ذات الطابع الوطني ( جواز السفر ، صامدون هنا وزيد و زيد ... ) .والموسيقار ديالنا دار أول فرقة موسيقية ليه سنة 1972 وكانت فمسقط الرأس ديالو بلدة عمشة ، من بعد ذالك مارسل خليفة خرج للوجود بأول أسطوانة ديالو فباريس سنة 1976 كانت فيها 4 ديال القصاءد الشعرية ديال محمود درويش و قصيدة جفرا ديال الشاعر الفلسطيني عز الدين المناصرة ( جفرا من اقود الأغاني لي سمعت لمارسل ) و من هنا توالت النجاحات من خلال بزاف ديال الألبومات( سقوط القمر 2012 ، على الأرض يا حكم ، الجسر ، طلعت يامحلا نورها 2008 وزيد و زيد ... ) . قوة الملحن مارسل هو تعامله مع العظماء ديال الشعر العربي و لكن هدشي كامل فجيه و الإبداع ديالو فجيه لأن لو عطينا هاد القصاءد لأمنيكس إلحنهم ستحدث الكارثة هههه . مارسل خليفة حصل على بزاف ديال المناصب التشريفية نذكر منها على سبيل المثال لا على سبيل الحصر :
* فنان السلام من منظمة اليونيسكو سنة 2005
* مدير أولكسترا قطر الفلهارمونية (من 2008 تال 2010 ) إضافة الى أنه احد المؤسسين للأوركسترا نفسها .
لتتويج المسار الإستثناءي ديال هاد السيد و لي مازال كيعطي و أخر الإبداعات ديالو ألبوم يطير الحمام ( أندالوسيا الحب من أخر ابداعات الراحل محمود درويش ) توج الفنان بزاف ديال المرات نذكر منها :
* جاءزة الإعتراف الثقافية و الفنية من وزارة الثقافة التونسية 2012
* الميدالية الوطنية لفلسطين 2001
* ميدالية القدس ، بيروت فلبنان 1981
* الإستحقاق و الإنجاز وسام الفكرية ، فاس المغرب 2008
لموهيم خيتاما أنا حاولت نقربكم ما أمكن و بطريقة مختصرة من هاد المبدع واخى مچلتش كولشي ، حيت إلا بغيت نعرفو مزيان خاصني حلاقات هههه . نتمنى تكونو ستافدتو شي حاجة من هاد البورتري المتواضع و الأهم هو نخرجو من رتابة المواضيع السياسية لي طغات على الكتابات ديالنا في الأونة الأخيرة ..
ب.س: لي عمرو تصنت لمارسل خليفة كنصحو اتمزك لأغنية ريتا ، أحن الى خبز أمي (والله إلى توحشت خبز لواليدة ههه ) ، تصبحون على وطن و يطير الحمام ( أندلوسيا الحب ) .

★المصادر :

( https://ar.m.wikipedia.org/wiki/مارسيل_خليفة )

( http://www.marcelkhalife.com/ )

( http://www.mawaly.com/music/marcel+khalifa/albums )

تابع القراءة

يفاش نفاليدي بأقود النُوقاط فلاففاك

كلافيي القدير Simo Feynbert 

#تقديم : غالبا أي ولد أو بت لق●●● قراي(ة) سولتيه(ا) كي كا دير حتى كا تضرب لي نوط les notes المقودين كا يضرب ليك الضحكة السفرة و يقلب الموضوع، أو كا يعطيك شي حوايج لا علاقة ... و هو غاراضو دين الكلب يتلفك على الموضوع تحت الشعارات التالية :
- سر المهنة.
- لا تعُط سرك لعزيز فإن لكل عزيز عزيز.
- إستعينوا على قضاء حوائجكُم بالكتمان.
- العين حق.
باختصار شديدد كا يحس بكرو طايح على شي كنز ( و هو طايح على الخنز) و كا يخاف لا يوريه لشي واحد و يسرقو ليه، أو يولي مُنافس ديالو.
و باختصار أشد، هادي سميتها ثقافة الإحتكار لي كا تنافي عقلية الإشتراك
esprit de partage.
هاد ولاد ل●●●● كا يطبقو قانون المادة couper لي كا يقول :
إذا عطيتك درهم و عطيتيني درهم، النتيجة هي كل واحد منا عندو درهم واحد .
و ما عندهومش مع قانون الإشتراك copier لي كا يقول :
إذا عطيتك فكرة و عطيتيني فكرة، النتيجة هي كل واحد فينا غا يكونو عندو جوج أفكار.

هاد ولاد ل●●●● مازال ربهوم ما كا يفرقوش بين copier و couper، كا يحساب ليه إلى وراك طريقة الدراسة و الإعداد للإمتحان، غادي تنتاقل من عندو و تجي لعندك.
المهم ندوزو للموضوع باراكا علينا من هاد المقدمة ديال التب.
#قبل_ما_نبدا : خاصك أ جمي تحقق شُروط الإستقرار les conditions de la stabilité
ولي هوما :
#أولا : الإستقرار المالي la stabilité financière : و كاين لي كا يسميها الأمن المالي la sécurité financière بمعنى أ زبي، راه ما يمكنش و ألف ما يمكنش تقرا و نتا عايش فلاميزير و الحفرة و حاس بالحكرة، ما يمكنش تقرا و تفاليدي و نتا كا تفكر ملين تهز و ترد الكريدي ؟ و بالتالي خاصك تضبر على الصرف بأي وسيلة واخا تعرف تتسلف من البدية تاع العام، و دير مع شي واحد حتى توضف عاد ترد ليه، أو تقول ليه استثمر فيا أ ولد الق●●●، و ملي نتوضف نسوفيك. و إلى ما لقيتيش لي يسوفيك فهاد الحالة، هنا غا نصحك بالخدمة فالعُطل.
و أححسن فترة تخدم فيها هي الصيف. جمع الماكس ديال اللعاقة و خدم بقانون النملة، باش ملي يبدا العام الدراسي يكون الجيب عااامر و يقول للعقل غني.
#بحالاش_فاش_يمكن_ليا_نخدم ؟
- شخصيا كنت كا نخدم فتجارة الكُتب، كا نتسلف راس المال، و كا نشري الكتوب من سوق الجمالة، و كا نفرش فشهر 8، كا ندي كروستي و نتخارا مع المخازنية و طحن مي، و نجلس، لا قلت ليك شحال كا نتيري ديال اللعاقة غير ف15 يوم من البيع ديال الموسم الدراسي، غادي تقول خونا طالق عليا السلوكية ، أللهم نسكت حسن.
- و أيضا كنت كا نخدم فدروس الدعم، كا نزيد السوايع لطلبة الباك ملي كنت فالسنة الأولى، و صحاب لاففاك Fu*k ملي طلعت للسنة الثانية و ديما مسوفي كري. و مستااقر ماديا.
- شي مرات كُنت كا نتحنسر لدرجة كا ندير صاكي فكتافي و نمشي فالليل ندخل للحي الجامعي و نجمع الخبز اليابس باش نبيعو فالصباح، أو موان كا نلقا غير باش نفطر.

#ثانيا : الإستقرار العاطفي : la stabilité émotionnelle : أ تعيا أ ث*ي ما دير فيها راسك بطل و قلبك محجر و تقدر تعيش مستغني على الجنس الآخر و الحوب و داكشي، و لكن البشر كا يبقا بشر عندو تب و قلب و نظر، و ضاروووري خاصك الكوبل أجمي لي تشحنك بالحوب و الحنان و تشارجي ليك باتري القليب ملي يخوا ليك. تقدر ما تتافقش معايا فهاد النقطة و تقول ليا، لا هادشي كا يضيع الوقت و الطاقة، أنا غا نفتح المجال ل لي كوبل لي ساهمات علاقتهوم فنجاحهوم و نسد كري دابا و ندوز لثالثا.

#ثالثا : الإستقرار الجنسي : la stabilité sexuelle : ملي كا ياكلك راسك خاصك تحكو، و ملي كا يجيك الجوع خاصك تقصي، و ملي كا يجيك النعاس خاصك تنعس، و ملي كا تنوض البخوشة و تشعل العافية خاص لي يطفيها ....
وااااا تبي، ملي كا تنوض فيك الشهوة و كا تسمع الحيوانات المنوية فق*يواتك كا يقولو :
- الشعب يُريد إسقاط النظام، الشعب يُريد أكل الحلوى، الشعب يُريد، ربيعة خت وحيد ...
ملي تنوض فيك الثورة وا حق سيمو لا قريتي شي ق*وة، و لا فهمتي شي ق*وة، غا تلقا كرك غير كا تكدب على راسك. و بالتالي فهاد الحالة، يا غا تمشي عند بائعة الحوى، أو تشحط الحو و توفر المصاريف و تقتاصد على كرك، و راه الدراسات العلمية تبتو أنها مُفيدة للصحة و التخلص من الستريس stress و لكن فحالة ما كنتي كا تشحطو و تحس بالذنب و تأنيب الضمير و سقوط الرجولة فهاد الحالة غادي يكون عندها ضرر على الصحة ديالك النفسية.

#رابعا : الإستقرار العائلي la stabilité familiale : فهاد الحالة أ جمي إلى كنت الأوضاع ما مستاقراش فالدار (مك كا تخارا مع باك مثلا أو باك أو خوك حاضيك و داير ليك العصا فالرويضة ) خوي من حداهوم و كري على كرك أو سير للحي الجامعي، و للمرة 4 لا ما لقيتي ما تعطي لواليديك عطيهوم التيساع.
#خامسا : لي عارف شي نوع خامس من الإستقرار يطاغيه فكومونطير.

#الخُطوات :
1- من البدية تاع الموسم الدراسي أو السوميستر كا نقلب على جميع ليكزامانات لي فاتو فجميع الموديلات. علاش ؟
لأن الأساتذة الجامعيين كا يعاودو الإمتحانات كيما كا يعاودو البوليكوب، و لد ال*حبة كل عام كا يجي يغير فيه غير السنة الدراسية، ما كاين لا تجديد و لا تنقيح ولا تطوير.
نصحتك بهادي كخُطوة أولي للأسباب التالية :
- أولا : غادي تختاصر الوقت و الطاقة و تعرف شنا هوما لي بارتي les parties لي كا يركزو عليهوم الأساتذة.و بالتالي غادي تدير الإمتحان كعامل مُوجه ليك فالخدمة. باش لي كا تحط فالإمتحان تقراها، و لا ما كا تحطش تمزق ديلمها كل مُمزق.
- ثانيا : غادي تفوكيسي أو تسيبلي (تركز) على المعقول، و لي لا علاقة عليه تبول. بمعنى غادي توجه الطاقة ديالك على الستونات لي داير عليهوم الفيلم ديال النقطة المقودة.
2- ملي تبدا تقرا الكور غادي تركز على الكلمات و العبارات المهمة les mots clés لي مذكورين بزاف فليكزامان، و غادي تماركيهوم بالقلم الفوسفوري باش تضبطهوم و تنكحهوم مزيان.
3- غادي تبدا مُباشرة تحاول تخدم ليكزامانات من البدية تاع العام، أي شابيتر شرحو البروف أو فهمتيه غا دوز للتطبيق فالإمتحان. بهاد الطريقة غادي تكون غادي فالطريق الصحيح نحو أقود نُقطة.
#فحالة_حصلتي_فشي_إمتحان و ما لقيتيش الفقرة من الكور لي تساعدك باش تحلو، غادي تدوز للكُتب ديال تمارين و حُلول و لي هوما السر الأعظم ديال النقط المقودين. بمعنى غادي تشوف شي تمرين لي كا يشبه ليه.
4- تمارين و حُلول : من مورا ما تقلب على جميع ليكزامانات لي فاتو، غادي تدوز لكُتب تمارين و حلول لي غا تقلب عليهوم بأي طريقة. واخا تعرف تسافر عليهوم. و ملي تلقاهوم ما غا طيحش عليهوم كي الدابة، غادي تخدم فيهوم و فقط دوك التمارن لي كا يشبهو ل ليكزامان، و لي هضر عليهوم البروف فالكور.
و هنا غا نصحك أ نرشدك أ جمي لواحد الدرس من أقود الدروس لي تعلمتها فحياتي و فطول المسيرة الدراسية ديالي و لي هو :
#قانون_قلب_شقلب : لي تعلمتو من أتاي، حيتاش إلى ما قلبتيهش ما كا يجيش مداقو بنين. بمعنى
أن أغلب الطلبة كا يحاولو يفهمو الكور عاد يدوزو للتمارن. نتا غادي تقرا الكور بلا ما تصدع كرك تفهمو، لأنك إلى درتيها غا تعصب و تمحن و تصدق سالط ربو مع لرض و خارج دور، نتا غادي تقراه قراءة عادية و غا تصطر على العناوين المهمة و الفقرات المهمة، و غا دوز نيشان لتمارين و حُلول تقلب على التطبيقات. بمعنى غادي تحاول تفهم الكور إنطلاقا من التمارن، و ماشي العكسسس.
ضرب الماكس ديال التمارن بتوجيه من الفقرات المهمة فالكور، حتى تضرب شي عشرة ديال التمارن على الأقل أو على حساب، و من بعد دوز للكور غا تلقا كرك حفضتيه باللاشُعور.

آآآ ثبي : واش يمكن ليك تتعلم العومان بالقراية تاع الكور ؟ أو كتاب كيف تُصبح سباحا ماهرا في سبعة أيام، و من بعد غا تلاح للابيسين و غا تا تغرق.
أحسن طريقة تتعلم بيها العومان هي الإحتكاك مع الما، بمعنى غادي تلاح فشي بلاصة ما غارقاش، و غا تبقا تخشي راسك و تشرب الما، و تخربق و تخلي الما يهزك، بمعنى غادي تمرن، حتى تولي كا تعرف تعوم لاشُعوريا.

هادشي دكرتو لأن أحسن طريقة لفهم الكور هي إدمان التمارن، لي زيكزيرسيس أ تبي.
كا نقولها و نعاودها.

5- كيفاش ندير مع المواد ديال الحفاضة ؟

أي مادة كا تحفض غادي نسجل ربها فmp3 أو تيليفون ، و نغني ديلمها أنا مع المزيكة، و نبقا نتمزك ليها فطريق لاففاكfu*k و خاصة خاصة قبل ما تنعس، لانك الذاكرة ديالك كا تكون عندها فاعلية مقودة و دماغك فديك اللحضة كا يكون كا يخزن الأفكار، بمعنى غادي تجيبها هي هاديك. وهنا تفكرت ننصحك بواحد القانون ديال : "من مات على شيء بُعث عليه" أنا كا نقول ليه " من نام على شيء إستيقظ عليه " بمعنى إلى نعستي و نتا كا تقرا، غادي تفيق و نتا مشهي القراية.
با ختصار : حاول ديما تختم نهارك بالقراية.

6- التوازن L'équilibre : من أقود الحكم لي قريت فحياتي هي وحدة فكتاب priorité aux priorités ديال ستيفن كوفي Steven covey : التوازن فكلمة "و" (عطف عبارة) و ماشي فكلمة "أو" (فصل عبارة)
l'équilibre se trouve dans le "ET" pas dans le " OU" ,
و التوازن أ تبي قانون من أقود قوانين الطبيعة، و حتى فالكيمياء كاين قانون التوازن ديال لو شاتوليي لي كا يبرهن على أنك كل ما حاولتي تضغط على التفاعُل يمشي فمحني مُعين كا يوقع العكس.

بمعنى أ تبي لا مشيتي ضغطتي على كرك كتر من الحد باش تمشي غير فاتجاه القراية غادي تطيح فقاعدة " الضغط يولد الإنفجار" و غا تجلس عليه و على قوالب السوكار.

#لي_بغيت_نوصل_ليك : هو ديرهوم بسطاش، قرا و مارس الرياضة،نوض جري مع الصباح، لعب كورا و عطي لكل ذي حق حقه، ولا غادي يعطيوك لكل دق دقهُ. قرا و حوي و لعب و نشط غير هو وقت القراية قراية، و وقت الزهو و النشاط زهو و نشاط.

7- التركيز la concentration : هنا غا نسولك أ جمي، حيتاش على حساب تجربتي مع الطلبة أنواع :
- كاين لي عندو تركيز تناقصي : بمعنى ملي كا يهز يقرا، الوقت كا يدوز و التركيز كا ينقص حتى كا يلقا كرو ناعس فوق البوليكوب، هاد خونا خاصو يغتانم البدية فقراءة الموديلات الصعبة، هو غادي و هو كا يهبط فالنيفو ديال الصعوبية باش يجيبها فنفس منحى تغير التركيز (دالة تناقصية).
- كاين لي عندو تركيز تزايُدي : هاد خونا داير ديلمو بحال العافيا ما حدك كا تزيدها العواد (الوقت) و هي كا تزيد تزند، هاد الساط خاصو يبدا بالموديلات السهلة، باش يمشي فنفس منحى التركيز، و يستاغل التركيز المقود فقراءة الموديلات الصعيبة لي كا تطلب تركيز أكثر.

#حاس_بيك_باغي_تسولني : أنا ما كا نقدرش نركز أ خويا واش كاين شي حل ؟
الجواب : الموسيقى التحفيزية لي اليوتيوب عامر بيها، يمكن ليك تقرا و نتا كا تمزك فنفس الوقت، هاد المزيكة غادي دير ليك رابط دهني فالمخ ديالك ما بين القراية و الموسيقى، لدرجة أنك ملي تسمع غير الموسيقى بوحدها غا تشهى القراية. و شخصيا ملي كا نبغي نطيح على القراية كما يطيح الزوج على زوجته في ليلة الدخلة، كا نخشي ليزيات فودني و ما كا نحس بكري حتى كا نلقا 4 سوايع دازو و أنا كا نحرف بحال إلى كا نطرف ( ههه) .
ثالث حاجة لي نصحك بيها : الشاي بالنعناع، أو القهوة كحلة ، او فيتامين c أو عصير الليمون هادو كلوهوم كا يطيرو النعاس.

8- الرياضة sport : و أحسن رياضة فالعالم هي السبور sport بمعنى خاصك تبقا تنوض تجري مع الصباح و تلعب كورا و تمشي لاصان و تمارس أي رياضة أتبي، و العقل السليم في الكسدة السليمة، و الرياضة كا تنشط الدورة الدموية و كا تخليك مركز و نشيط و آليز. و كا تحيد الستريس و الضغط و العيا و الإكتئاب ... تريض ليا مع كرك، و مرا مرا طبق مبدأ الطاقة التيتيزية l'énergie titizique و نوض جري ليك معا شي ساطة فالغابة دالساكنية او جنب البحر ديال سيدي بوزيد، و تهلا فيها ، ما نخافش عليك، وحتى نتي تهلاي فيه.

9- العمل الجماعي : le travail en équipe : تحت شعار : "إنما يأكلُ الذئب من الغنم القصي" النون فاليد و الراطراباج هوما الدياب، و الغنم هوما الطلبة، لي دار كرو نزق و بغا يقرا بوحدو يفهم بوحدو يفاليدو بوحدو كا ياكلو الديب ( و ماشي غير كا ياكلو شي مرات كاي ..) و شتي الديب شتو،شتي كعلالتو هههه .
المهم تبي : حاول تقرا أون كروب باش تقتل النعاس و يكون تركيزك أقوى، وحاول ديك الكروب يكون فيها حقل تيتيزي champ électrotitizique لي غا يساعدك تحفز باش تبان بطل و قراي و دكي و كا تفهمها طايرا، حاول ديما تستاغل التيتيز من هاد الجانب. عند كرهن التيتيز هوما لي كا يفهمو على ظهرك، و نتي كا تفيكسي لي زيدي و تفاليدي و تقوليك الميمة يرضي عليك أ وليدي على ظهرهن، كلاكُما يستغل الآخر.
و حاول ديما تكون نتا هو البطل بالكروب، ديما نتا هو لي كا يخدم التمرين الأول و يشرحو للعشران الأول، و كون سخي و ما تخبي تا حاجة على صحابك، و ما نحتاجش نعاود نفكرك بالفرق بين copier و coller .

10- ملي تكون كا تقرا و يجيك النعاس نعس حتى تدير الإشباع saturation باش ملي تفيق تكون فايق بالمزيان و فقمة التركيز، و إذا كنت كا تقرا و نتا كا تخارا مع النعاس غادي تصدق ما قاري ما خاري ههه بمعنى لا قراية و لا نعاس، ما غا تشد حتى وحدة فيهوم.

11- قرا بالحوب amour ماشي بالضغط pression : بمعنى خلي اطماعك فالنجاح هي لي تحفزك،ماشي خوفك من الفشل، و دير فبالك أن الماضي و المستقبل أزمنة لا وُجود لها على أرض الواقع، هوما من بين الأشياء لي ختارعوها ولاد القحاب، باش يخليونا عايشين فسجن الماضي، و مرعوبين من شبح المستقبل.
نسا عليك الماضي، و دبح الموستقبال بموس ماضي، و كون ناضي و عيش اللحضة أ تبي.
باللحضة غادي تصنع (ماضي ) مقود لي غا تفتاخر بيه، و غا تصنع حتى (مستقبل) وااعر و زااهر لي غا يخليك تعيش أسعد حياة، و درتهوم بين قوسين لأني كافر بربهوم كيما راني كافر بالزمن. و ما عندهوم حتى وُجود فالقاموس ديالي.
و الحمار عندو ثلاثة ديال الطُرق باش تحركو، يا تعلق ليه خيزوية قدامو باش يطمع فيها و يتحرك، و يا تخشيها ليه فكرو حتى يزعرط و يتحرك صحا على كرو، يا تشحط ديلمو يتحرك.
حتى أنا و نتا خاصنا نعلقو خيزوية قدام عينينا لي هي الهدف l'objectif باش نتحركو . سينون غادي تدور و تطلع معانا و نغوتو حتى نقزو بحال القط طوم ملي كا يجلسو جيري الفار على المسمار حتى كا تشعل معاه نار.

12- كون حمار : بمعنى ما تفلسفش بزاف، ركز على النقطة و أججل عليك المعرفة حتى لأوقات العطل، لان هاد ولاد القحاب لي شادين التعليم، ما بغاوناش كائنات مُفكرة، بغاونا روبويات قادرة على تنفيد التعليمات. ركز على الكور و التيدي و لي زيكزام لي فاتو، و إلى بغيتي المعرفة بكل اعماق قلبك غا نصحك بنصيحة وحدة و هي : خرج تقود من لاففاك fu*k. خرج من السجن الجامعي ديال الزب لي كا يركز على الحفض و الإتباع أكتر من التفكير و الإبداع، و في الإمتحان يُعز الطالب الآلي الحفاض و الطالب المفكر الفيلسوف يُهان.
- ( اترك المدرسة قبل أن يتعفّن عقلك من التعرض لأنظمة التعليم والمناهج والدرجات ، انسى حفلات التخرج واذهب إلى المكتبة وامسك كتاب واقرأ وتعلم بنفسك إن كانت لديك الجرأة ! ) ..

" Drop out of school before your mind rots from exposure to our mundane educational system. Forget about the Senior Prom, go to the library and educate yourself if you've got any guts "

- Frank Zappa
#واش_يمكن_ليا_نجمع_بيناتهوم ؟ بمعنى واش يمكن ليا نجيب النقطة و المعرفة فنفس الوقت ؟
الجواب : خويا و ختي لا بغيتو تجيبو النقطة كا نصحكوم تتخلاو على المعرفة و على أي حاجة لي غادي تعيق الحصول ديالكوم على نقط مقودة. بكل بساطة لأن المعرفة ماشي هي ديك ست شهور ديال القراية لي كا يكدبو علينا بيها فالعام، المعرفة هي نمط حياة mode de vie أو style of life المعرفة شي حاجة لي سنوات حياتنا ما غا تكفيهاش، و المعرفة تيتيزة حساسة بزاف، ما كا تبغيش لي يديرها طريق باش يوصل للعاقة و العياقة، و لكن كا تبغي لي يضحي باللعاقة و العياقة من أجلها. و دير اللعاقة باش تقرا، ما تقراش باش دير لعاقة و التوازُن هو :

- قرا مزيان و كون الأول ولا ترضى غير بالمركز الأول فلاففاك fu*k باش دير لعاقة. و ديك اللعاقة لي درتيها فلاففاك، ستاغلها باش تقرا فجامعة الحياة universety of life
لي غالبا المُميزات لي كا يخليوك تكون ناجح فالحياة، كا يعرقلو ليك حياتك فلاففاك، بحال الفضول العلمي و التوجه و الهوس و حب الفن، و الفلسفة و التأمل و التدبر و السؤال.
باختصار : كون حمار مؤقتا على ما تشد ديك الكارطونة و تضبر على كرك مع الدولة.
سينون : لا ما قديتيش تكون حمار، خرج تقود من لاففاك و لي عندو باب واحد لايسدو على على ربو، و أغنى أغنياء العالم حققو الثروة بالفريلانس خارج أسوار السجون الجامعية، عارف أنه ما كاينش شي واحد غا يوافقك الرأي لا درتيها، إلا أنا، و شي وحدين لي تخرجو من مدرسة المُعاناة.

13- بكرهك للأستاذ prof غادي تجيبها فكرك و تضر كرك و ما غا ضرش البروف :
بمعنى حاول ما تكرهش و ما تحقدش على الأساتذة، لانك لا شعوريا غا تنساق وراء كره المادة لي كا يقريو، و لا كرهتيها غا تطلع القالب فالتالي ديال العام. و بالتالي حاول تتقرب من الأستاذ و تبغيه بأي وسيلة باش ما يتأثرش الموديل ديالو، بمعنى غير فوجه الموديل، و ملي تفاليديه بنقطة مقودة ديك الساعة بزق على الأستاد لا تلاقيتي بيه.

14- ركز على الأسباب كتر من النتائج : بمعنى خلي تفكيرك يكون مسيبلي و مفوكيسي (موجه بدقة) على السبب لي غا يخليك تجيب أقود النوقاط، وما تفكرش غير فالنوقاط، و إلى إذا بديتي تفكر غا تولي عايش فالأحلام و الأوهام حتى تبقا سيمانة ليكزامان و غا تلقا راسك غير كا تحلم تجي نتا الأول و ما درتي تا قلوة. الموهيم ركز على السبب لي هو إدمان التمارين المحلولة كا نقولها و نعاودها، إيييه محلولة، باش تعرف كرك آش كا دير و فين غادي و يكون عندك معيار باش تتيقن من صحة الأجوبة ديالك و بالطريقة لي كا يبغي البروف. أصلا الأساتذة من تمارين و حلول مناش كا يهزو نيت.

15- خوي الستيلو : ديما كتب و كتب و كتب و عاود كتب، ملي كنت كا نبريباري للإجازة أ تبي ما كنتش كا نشوف كري شحال قريت من ساعة، كنت كا نشوف شحال من ستيلو خويت و شحال من تمرين حويت. وشي مرات ملي كا يوصل الستيلو للنص ديالو، كا نحلف إيما نهز كري على الكرسي حتى يسالي و ما تبقاشي فيه جغمة ديال المداد، إيييه أ خاي فؤاد، هادشي إلى بغيتي تكون مقود ماشي قواد، و إلى بغيتي فلافان د سومستر ما طلعش معاك العواد و يتشفاو فيك الجواد.

16- طبقا لمبادئ المنطق لي قرينا فالزيزيام، الناس جوج نواع، كاين لي كا يخدم بعطف عبارة "و" و كاين لي كا يخدم بفصل " أو". بمعنى كاين لي قدر يتكونيكطا و يقرا. و كاين لي قدر يتكونيكطا و يخرا. سو :
إذا كنتي من النوع لي الفيسبوك كا يليهيك على قرياتك سد ربو فمرة. و تفرغ للحرف.
سينون راك عارف تنضم وقتك.
17- وا حق ربك ولا قفلتي،لا فورتي : أو على الطريقة الأمريكية No gain No pain
لي هي الشعار ديال الحدادة دكمال الأجسام لي كا يطلعو بيها الجسم المقود، ألور : حتى نتا لا بغيتي تجيب نقطة مقودة خاصك تعاني و تعاني، و ديك المعاناة فيها مُتعة لأنك بيها غادي ترسم البسمة على أحب الناس لي قراب ليك و خاصة : الواليدين. و بيها غادي توصل لداكشي لي بغيتي.
أ وتحسبُ المجد ثمرا أنت آكلُهُ ؟ بل لن تبلُغ المجد حتى تلعق الصبرا .

18- le bonheur ne diminue jamais lorsqu'il est partagé
السعادة و العلم و المعرفة و تجارب الحياة ما عمرهوم كا ينقصو ملي كا تبارتاجيهوم مع الإنسانية، بالعكس كا يزيدو نور على نور، و بالتالي حاول أ ثبي أي حاجة فهمتيها، بارتاجيها مع صاحبك و صاحبتك بكل سخاء و تطبيقا لفلسفة العطاء، الشجرة أ تبي كا تعطيك لوكسيجين واخا ما عمرك سقيتيها، و البقرة كا تعطيك الحليب واخا ما عمرك شربتيها، حاول ديما تكون معطاء و تتقاسم داكشي لي فهمتيه و تعليمتيه مع خوتك، و هادا أقود أسرار النجاح لي قلييييل لي طايح عليه. و زيد عليها عمي الإلكترون ملي كا ينتاقل من مُستوى لمُستوى كا يعطينا فوتون، و الضو عبارة عن فوتونات، بمعنى أن الإلكترون هو لي كا يعطيك الضو la lumière و ما عمرو فرعن أو من و عاق عليك انه عطاك الضو، بكل بساطة لأنهُ كان محتاج يعطي، و إلى ما عطاش غادي يفنا و يفنا معاه الكون كامل. هاكا صحا على ربك خاصك تعطي و تبارتاجي، ولا ما عطيتيش غا تجيبها فكرك. و ما غا ضر حتى واحد، النبتة ملي كا تمتانع تعطي لوكسيجين كا تدبل و تموت.
و إلى كنتي كا تحس بكرك فيك الإكتئاب و باغي تنتاحر و تودع هاد العالم، عرف ان السبب هو الإمتناع ديالك عن العطاء و الإحتكار ديالك، نوض عطي و تبرع بأفكارك و دمك و مالك و رد عليا الخبار، و لاحض بماماين عينيك أن الإكتئاب كا يطير كيما كا تسوط على الغبار ...

و فالختام سمحو ليا لا طولت عليكوم، كنت باغي نفرق المقال لأجزاء، و لكن خفت كري لا نموت، و ما نبارتاجيش معاكوم أقود دُروس الحياة.
دابا حتى إلى جات الموت مرحبا بيها، غا نموت و أنا مرتاح.
و لي عندو شي إضافة أو انتقاد أ وتصحيح يتفضل فالتعليق بكل قلب بيض و مفتوح، كولنا كا نتعلمو من بعضياتنا، و حقيقة وحدة لي كاينة و هي : الحقيقة إسم فقط، كا يتجسد فحالة وحدة لي هي الموت لي تا واحد ما كا يمنع منو.

تابع القراءة